Thàinig pròiseict “An Sgàilean Ùr”, a tha Mòrag Stìubhart agus Sealladh air a bhith a’ ruith o chionn cheithir bliadhna, gu crìoch shoirbheachail aig Fèis nam Meadhanan Ceilteach na bliadhna-sa ann an Steòrnabhagh.  Bha trì sgoiltean air an riochdachadh anns a bhuidheann a rinn taisbeanadh de fhiolmaichean goirid aig aon de phrìomh Fhèisean a ghnìomachais. 

B’iad Allannah Pheutan is Kirstin NicDhùghaill à Ard-sgoil Phort Rìgh, Artair Brook-Young à Bun-sgoil Shlèite agus Sophie NicRisnidh is Mairead Morgan bho Bhun-sgoil Ghàidhlig Inbhir Nis a thadhail air an Fhèis, a rinn òraidean mu na fiolmaichean aca agus a fhreagair ceistean bho na bha làthair.  A-measg an fheadhainn a sgrùd an òigridh mun obair aca, bha Dòmhnall Iain MacIlledhuinn bhon BhBC, Ailean MacAoidh bho Thasglann Sgàilean na h-Alba agus Brian OhEadhra bho Bhòrd na Gàidhlig.  An-làthair air an latha cuideachd, bha Proinsias Nì Ghràinne bho Sianail Na Gaeilge ann an Èirinn, a dh’iarr leth-bhreac de na fiolmaichean agus i an làn dùil gun rachadh an craoladh air TG4.

Fhuair a’ phròiseict gu lèir taic is maoineachadh bho Bhòrd na Gàidhlig, Comhairle na Gàidhealtachd, MG Alba agus Sealladh.

Tha Sealladh an dòchas na fiolmaichean a thaisbeanadh ann an Inbhir Nis agus san Eilean Sgitheanach ro dheireadh bliadhna na sgoile. Cumaibh sùil a-mach air an son.